‘’WE DON’T NEED ANOTHER HERO’’

                   

               Kum 1988 bawr vela US mihang nula zaithiam zet mai Tina Turner hla ‘hit’ tak hemi kuma Grammy Award ‘Best Female of the Year’ a lak phahna hial hla ‘We don’t need another hero’ hi ka rilru ah a lo lut thut mai a, he hla hian eng chanchin nge a neiha, enge a sawi tum tih leh eng vanga he hla hi phuah nge a ni tih lam hi sawi ka tumlo a, a sawi pawh ka thiam bawk heklo. Ka sawi tum lam leh he hla thu tlar te ka rilrua a thawh dan chu hetiang lam daih hi a ni.

               Tunah chuan kan Zoram chu kawng tinrengah kan tlachhia in, kan Economy a thang chaklo khawp mai a, helai karah hmasawnna ruhrel leh dan leh hrai ken kawh chungchangah kan ram hruaitu te an hlawhchham thawthang nen, hetih lai hian Zoram chu Sualna chhumdumin a tuam let tawp ta nek mai si!!.He mi kawng hrang hranga Zoram mipui te min chhanchhuaka, State intodelh leh hmasawn, khawvela ram nuam leh ram dang mi te tan thlamuang taka zinna tlak leh nakina thangthar leh zel turte tan chenna tlaka siamtu tur, ram hruaitu “HERO” hi kan va mamawh tawh em? He kan ram zimte hi hnamdang leh ramdang mi Mr. Obama te Mr. David Cameron te Mrs. Sonia leh Mrs. Mayawati ten min rawn siam that sak dawn lova, a chhunga mi ngei, tuna sawrkar chelhmek tu leh nakina sawrkar la ni leh zel turte Party Leader theuh ten mawh an phur khawp mai. Ram hruaitu tha, midang tana inpe, tawng ve mai mai ngailo, mi inngaitlawm, Pathian hming a narana lam mai mai ngailo mi, a lam tawh vek erawh ram mipui zawng zawngte tan a thlamuanna leh malsawmna tling ram leh ram mipui te a kaihhruaina kawnga a ngaihna hre mi leh thangthar lo la awm zel tur te tana chenna tlaka siamtha tur Politician thangthar ten kan zawng mek zel a ni.

               Kan hmabak nakum 2013 ah kan ram hruaitu tur kan thlang leh dawna, he kan ram hruaitu tur kan thlanna kawngah hian keini mipui te(a bikin thalai te) hian ngaihtuahna seng tak maw!! Kan ram tana “HERO” tlak ngei thlanchhuah I tum hram hram ang u. Inthlan dawnah Party tin ten Programme leh Manifesto tha tak tak an rawn zuar leh anga, sawrkarna a chan huna ti hlawhtling leh duh silo ang chi te an sawi thiam em vang ringawta bawh huam huam lo in an thil tum leh an sawi zawng zawngte kha thil tihhlawhtlin theih a ni em tih ngun taka kan zir chiana, kan ngaihtuah hmasak a tha khawp mai.

               Thusawi thiam ringawt hi ram hruaitu atan an lo tha berlo tih chiang taka min hmuh tirtu chu, Tuna America President Barak Obama khu a ni, inthlan an neih dawn campaign naah khan US mipui te hnenah “CHANGES” thlen tir a tiam a, khuti khawpa ram ropui leh ram hausa, abak awh leh

chuang tur leh mamawh dang nei leh tawhlo tur khawpa Sawrkar thil tithei nisi, mahse, mipui ten he mihang tlangval hian enge a thlentir dawn tih hriat an chak a, an han thlangtling ta chu ania. Obama in America ram a hruai kum thum chhunga ‘Changes’ a thlen langsar ta ber chu, America Kum 50 chhunga mi rethei pun dan leh a rorel chhung tlemte a mi rethei pun dan a intluk vel a ni. Tunlaia US economy tlakchhiat chak dan te khu namailo tak a ni.Chuvangin inthlan dawna Party hruaitu te campaign laia an thusawi ngaithla liam mai mailo a, ngaituahna senga, vawntlat hi mipui pawh hian I ching thar teh ang u.

               Vanlalsailova hla lar tak ‘Si a’ tih hla a,”Zoram siamtha a tungding tur hian tu dang an ngailo” kan political Party leader ten mawhphurhna sang tak an neih ang hian,keini mipui te pawh hian tihtur kan nei ve a, khua leh tui tha nih, Sawrkarin dan leh hrai a siamte tha taka zawma, mahni hmazawn theuha kan tihtur te kan hlen zel hi mipui te mawh phurhna a ni.

                Engpawh nise khawvela kan awmchhung leh chatuan thleng pawh in kan ‘’Hero’’ atan “Lal Isua” hi thlang ila, hei hi kan chenna min enkawla kawng dika min hruaitu atan Lal Isua tih mi, kawng tinrengah amah rawn tlat zel mi kan thlan chhuah thiam hi a pawimawh takzet zet tawh a ni. Hnam dang leh Ram dangmi te “Hero” kan ngailo, He Zoram chhung ami ngei hruaitu tha, thalaite entawn tlak leh zui tlak ngei hi a ni “HERO” kan mamawh chu, “WE DON’T NEED ANOTHER HERO’’.

Suangtuahna ka hlimpui tawh mai!!!

Hun leh kumte liam in hringnun hian par thar chhuang in hnahhlui te chu hnah
thar in ron thlak zel thin mahse he thinlung ah hian nang chhing zo tu reng an awm silo..
 Lo awm ta tehreng poh nise chutiang mi chu ka tong duh chuang lo,achhanchu mo..
Nang hi ka tan chuan I tok em em reng a ni. Mi ten engtiang in nge min ngaih ang
tihlam ka dawn lo,nang in engtiang in nge min hmuh zok tih hi ka thupui ber a ni fo thin asin...!
Mi hmuh a moi hian ka tan awmzia a neilo,ka duhber nang in moi min tih phot chuan chu tluk
 a lomna chu ka tan engdang mah a awmlo.... Mite chuan an hmangaih te ANGEL tluk hial a tha
 leh moi in a tehkhin thin a nia,mahse mo kei cuan tehkhin tur che ka hre ve lo...min dem mai suh o...
Nang aia tha tehkhin tur hi ka hmu tlat lo a ni.... Thinlung chhungril ber atang a chhuak
hmangaihna ngei mai kim lo leh chiang lo tak a ka hlan ve tum che kha ila hria em...?
Hmangaihna mit in min enlet ve ang tih ka ring pha reng reng lo asin... Mahse tun ah chuan
 hmangaihna mit ni a ka lo hriat ve thin chuan a hmuh phak loh chin a thleng ta...
Nun hi a bul atang a tan that theih nise ka va ti em....
He thinlung ah hian chatuan in i hming a inziak toh don si a,suangtuahna hlimpui hi ka chantok a ni ta reng mai..

2001 Christmas

Suangtuah na hlimthla ah chuan nang ngei kha a bul ah i awm reng thin asin,aa mamawh em em che a,

i awm ngai silo,a thlahlel ngawih ngawih che a hmuh tur i awm silo. 2001 Christmass kha ani lawmni,

he hringnun chhuan tur reng reng neilo ni a in hre thin khan Chhuangtu neive ni a, a inhriat tan na kha...

 Sap ( mingo ) hovin, " Love at first sight" an lo tih thin chu sawifiah ngai lovin a tawngtu a nih meuh

 chuan a lo fiah duh ngei mai. Chu hmangaihna chuan engtiang chiah in nge a nun ah danglamna a 

thlen dawn tih hrelawk ni se chuan bul a tan lo tawp tur a nia le. Hlimna par an tlan a,khawvel 

hi an tan chuan a mawi thin,mahse chu chu HUN hian a hriatpui ve silo... Chhungkaw lam buaina avang

 in an Inthen a lo ngai ta,inhmangaih tak chung in an inthlah a,mahse hmangaihna chuan a kiansan silo..

 Kum 4 a vei hnu ah malsawmna a ni nge anchhia zawk Manipur ah an intawng lehta hlawl mai...

Tibuaitu chun leh zua te an awmlo bawk a,an tan chuan khawvel hi a thar leh ta sar mai le,hmangaihna

 hun rei tak muthlu tawh hnu chu kaihthawh in a awm leh a,nun hian hlimna a thlen leh ta.

 Mahse maw... hun hi ava nunrawng tak em...Inthlahlel ngawih ngawih te a pawt then leh thin si....

2006 April thla alo her chhuak a,khuanu remruat kan ti dawn nge an In hmu leh ta hlawl mai,tun tum

 ah hi chuan Mizoram ah Mobile phone te kan hmang ve ta bawk a,chhungte hriat lemloh pawh in an 

inkawm reng thei tawh ang. Mahse,hetiang hi a ni ngawt lo,khuanu samsuih loh tur hi chu eng tin 

emaw hian harsatna hi alo thleng fo thin... Zirna avang in an inthen alo tul lehta,hun rei tak 

an inhmuh loh hnu ah 2010 May thla ah an in hmu leh a,hemi tum hi chuan a hmeichhia zok ah danglamna 

soifiah maitheih siloh a awm ni in a hre tawh a, mahse beiseina erawh a la hloh phal chuang lo..

 A hmangaih ber hmu tur chuan Bangalore thleng a zuk kal a,mahse,a beiseina chu athlawn mai alo nita,

a tan chu hmun ah chuan tih tur a awmve tawh lo. Theihngilh a tum nasat poh leh a rilru ah a thar leh 

thin si a,a theihngilh phal tak tak chuang silo,a hmangaihna zawng zawng a hlan tawh si a... 

Kum 10 chuang a liamta, 2001 Christmas-a a hmangaihna ai in tun a hmangaihna hi a let 10 chuang 

in a pung a ni chauh si a....

MUMANG MIN TIHLIMTU

MUMANG MIN TIHLIMTU

He leia mihring lo piang, pian dan phung pangngai leh mi ang ve pangngaia midangten an ngaih chin tawh phawt hi chu MUMANG hi kan nei thin theuh ni awm tak a ni. Mitena an ngaih dan chu ka hre lo, keima mimal ngaihdanah chuan MUMANG neih fo thin hi a tlangpuiin neih ngai mang loh ai chuan a nuam zawk hlein ka hria. Zanah emaw, chhunah emaw pawh, mut chhuak tak maia kan han mu a, kan taksa lam leh rilru lam hah zual phahna pakhat mah awm chuang lova, kan tih theih loh pui pui tur kan han ti thei thin te, kan nih phak miah loh kan han ni vung mai thin te hi chu a nuam danglam ve reng reng mai a. MUMANG nilova a tak taka chang nghal mai thei niseng kan duh zawk chang a tam mai thin.

Mang lam hi chu MANG a nih ang ngei hian a chiang tak tak thei lova, a changing midangte kan han ni lawk a, a changing keimahni te kan han ni leh lawi a. Cuhvangin thil tak tak a nih loh hi a nawmna ber pakhat chu a ni awm e. Ramsa lian pui pui main min han um emaw, rulin min han chuk dawn lai mek emaw, hlauhawm leh thih theihna hmun niawma kan hriatte atanga chhanchhuaha kan han awm a, kan han thanharh hlawl a, a tak tak a lo ni leh ta lo hlei hlei hian MIN TIHLIM man zawk emaw chu aw, tih chang a awm thin.

Mang kan han neiha kan awmdan tam ber thin hi chu, kan awmdan pangngai ang deuh thuak, amaherawhchu thil reng reng a lem ang deuh hleka kan tih leh hmuhna ni berin alang. Thil kan tih mek lai, kan nih mek lai leh kan thawh mek lai atanga MANG kan neih zui hi a tam berin a rinawm. Kan rilrua kan suangtuah zin deuh hi manglamah pawh kan hmu tam deuh thin niin a lang bawk.  Mak ka tih em em mai chu, MANG pangngai chiah hun hran leh hmun ngai reng reng loh ram emaw, hmun emaw, mihring emaw MANG lama kan hmuh fo thung si, mang lo lama a tak taka kan hmuha mang lama kan hmuh tawh thin ngei a ni tih hriat tur kan han hmu leh thin hi a ni. A chang phei chuan khawvel pahnihah hian kan cheng a, pakhat zawk hi chu chiang vak lovin kan hmang emaw ni chu aw, tih  chang ka nei fo mai. Chu bak lehah chuan, thil lo thleng tur dik tak taka lo man lawk a awm thin hi mak ka ti leh a. Mahni mimal nun emaw, thil lo thleng tur mak bik emaw te lo man lawk chang a awm tlat mai thin phei hi chu thil mak tak chu a ni e.

A tlangpuiin MANG lamah hi chuan SUPERSTAR ( thil ti thei chung chuang bik) kan ni deuh ber a. Mi kawlh sa kawlh beih emaw, thil harsa deuh han tih tur awm reng rengah a tlangpuiin a thei ber nih kan hauh deuh zel a, a chang erawh chuan chan a chhiat ve leha kan harh tak hlawl a awm bawk. A lan dan tlangpui chuan MANG reng reng hi khawilai emaw hmun, boruak zang tak hmuna neih a ni deuh ber a. Kan nun dan pangngaia thil awmsa kan han hmuh tel chang pawhin tlema a lem deuh leh lang nalh deuh lamin kan hmu ber thin.

Kei mimal takah vannei ka la inti hle rih a. Mi thenkhat nu leh pa leh laichin unau hnai emaw, tu leh fate emaw thihna avanga lo then tawhte tan chuan mumang  hi chutiang an then takte nena, a tak ang maia inkawm leh inhmuh theihna hun tha tak niin a lang. An thlalakte  emaw han en ngawt mai ai pawha a tak tak deuh zawka, hmai chhana tawngka ngeia han inbiak theih leh tumte phei hi chuan MUMANG ral mai tur chu a uihawm duh hle thinin ka ring.

Nupui  emaw, pasal emaw pawh   hrilh ngam mang loh, mahnia vawn khiau ngai MANG han neih tum phei hi chuan, MANG hi kum khat tal chu han chen theih rih ni seng tih hi nu tam tak, pa tam tak duhdan a nih ve ngei a rinawm. Khuanu samsuih ni ngeia inhria a, damlai kawng chhuk chho hmang dun tura Vestry pawh ni lo, Zokhaw daifema thingbul lungbul chauh hriatpuitu neia hmangaihna thuthiam lo thlungtu mi tam tak, engemaw vang emaw, tutee maw vang mai maia nupa kawp tuak ni thei ta lote tan lek phei chuan, he MANG lam hi inhmuhkhawm lehna hmun, vanglai hun ang chiah sulhnu han chhui dun leh theihna HUN LEH HMUN tha ber a ni kan ti lo thei lovang. Thenkhat mi vanduai zual, nupui pasal pawmlaite nena hlimna hmu thei hlawl lo, an kumkhaw lo lungdum ve, engemaw mai mai vanga nei thei ta lote tan lek phei chuan, MANG lama an TAWIH HLUITE an han tawh fuh chang chu HLIMNA an neih theih ve hun awm chhun a ni chauh thin reng a ni.

Chutiang hunahte chuan MANG han ral riai riai mai tur chu a uihawm duh thin awm teh e… An han thang harh a, meng thip khei khawi, nupui/pasal thunun tum ran mai, chhungte lam chauh kawi lut dum dum a, nupui/pasalte lam reng reng chu ral beih taka bei duh zel mai, kianga lo mu ve reng mai si neite tan lek phei chuan MANG LAM hi chu a van nuam danglam dawn bik tak em. Chuti mai a ni lo, pa thatchhe tak zu rui reng mai, inchhung lam reng reng ngaihtuah lo, ei leh in duhtui fu si, thikthu ti chhe em em mai, pasala neitu nu tam takte tan lek phei chuan, MANG lama an tleirawl hunlai emaw, an nulat tawh hnu emawa an TAWIH HLUI, rilru takah phei chuan an duh zawk, an neih theih tak si lohte nen MANG lama LENLAI an han chen ve thin chu a nuam dangdai bik thin awm mang e. Han harh se, pasalte luak emaw then zui mai a ngaih chang phei chuan MANG LAM ramah chuan thikthuin ro a rel thei lova, min rel chhe zuitu tur pawh tumah an awm thei lo, a lo hre vetu leh a lo hmu vetu, tumah an awm tlat loh avangin. Dik takin sawi duh tan gat hlawm ila, mang lama kan awmdan chiah hi Cinema film anga tih chhuah ni ta ang sela, kan nupui/pasalte ngeiin min han hmuhpui thei thin ngat seng chuan nupa tang then hi tuktin deuh thaw hian kan phun phah ngeiin ka ring thin. Chuvangin chutiang ang MUMANG chi reng reng chu I zep tlang tlat zel ang u, inhauna a ti tam ang. Pathian hian MANG hi min lo siam sak ta lo ngat seng chuan NUN hi a van hrehawm zual dawn em. Chhun lama hlimna reng reng nei ve ngai lo tan pawh, zan lama hlim vena MUMANG a lo awm hi chu a vanneih thlak a ni. Hetiang hian ka ngaihtuah thin :Khawvel nuam zawk, vanram ni si lo, thil reng reng urhsun taka hmang miah lova awmna hi, a hranin Pathian hian min siam sak niin ka ngai.

Ka tleirawl laia Zonunmawii, tuna amah tak Zokhaw nu hmel pawr ve tawh tak pawh kha, MANG lam ramah chuan tleirawl hmelpu khan ka lo hmu fo thin a. Ka nupuiin min thik ang tih hlau lo ngat phei ilang chuan SLEEPING PILL thla hnih lai hmuthilh theihna han leia, mang lama Zokhaw dai ngeia Zonunmawii tleirawl lai hun ngei mai han kawm vel leh hi ka chak ber  a ni. Zokhaw daia builukham leh tlangsam buk kara Zonunmawii hmel ngei han hmuh leh aia chak reng reng ka nei lo. Mahse tunah zawng nupui fanau ka lo nei ve ta a, thikthu ti chhe thei apui an tam ta si a. NUN TAKNA, a taka nunna khawvelah phhuahchawp nunin nun a ngai ta si a. Chutianga mang tuihnai han man tum pawhin, a lai laklawh laiah “Mamapa tho vat the, Valtea a zung tlat mai” tia intumbun tir tak mai mai lah a tam ta. Zonunmawii khan mang lamahte min hmu ve thin tak ang maw? Min hmu ve a nih pawhin a zep ve tlat thin awm si a…ka khawngaih mang e aw…!

Aw le, mang hi nei ta lo ila, leia mihringte hi kan nun ava hlim lo nasa zual dawn em! Lungngaih ni pawha min lo chhawk zangtu, min hnemtu ber thin chu MUMANG hi a lo nei ve a. Chuvang chu a ni ange Mizote chuan thiante kan then dawn reng rengin dam taka awm tura kan induhna bakah, mang lam pawh nei chhunzawm ve zel tura induhsakna kan hlan zela DAM TAKIN … MANGTHA FO LE.. kan intih thin h

Zonunmawi

ZONUNMAWI

Tlawmngaihnate midangte tana inpeknate aia upate zahthiamnate hi Zonunmawi tih hian a fun kim awm e. Kan pi leh pu hun lai kut ni vangthla an hman hun lai vel hian tlawmngaihna leh aia up ate zahna hi an lantir thin a, mi chhunchhia leh hmeithai rethei zawkte tan a thlamuan thlak hle thin a ni. Zonunmawi hi tunlai a Kristian nundan tur diktak ni awm hi a ni.

Tunlai thangtharte nunah hian Zonunmawi han tih hmuh tur a vang ta em em a, thangthar te nunah hian Zonunmawi hian khumlaili hi a changpha ta lo chiang hle, aia upa zah chu sawi loh kan nu leh pa, pi leh pu rual te zahna hi khawiah mah hian hmuh tur a awm ta lo, kan Mizo nunah hian mahni hmasialna te duhawmnate itksikna leh thikna te hian hmin laili chu a luah ta hle mai. A bik takin khawpui zawk ah te phei chuan Zonunze mawi hmuh tur a vang leh zual awm e. Khawimaw lai thingtlang ah te chuan hmuh tur lo tam viau mai thei, mahse hengah te pawh hian zawi zawi a in Zonunze mawi hi a bo tial tial zawng a nih hi. He Zonunmawi pil bo a, ral mai tur hi ui em em in Pu Zirsangzela Hnamte chuan…

                                    “Aw Zonunmawi chulhnu parang

                                    Lo vul leh la.” ati lawm lawm a

A siam that na, “Mizo nih mai hi a tawklo,

Ram hmangaih mai a tawk lo,

I nunah Zonunmawi

Inlar chhuak leh rawh se,”ti in thangthar te min chah lawm lawm a ni. A tih ngaihna hrelo Zonunmawi a auh lawm lawm pawha liam zel chu ui em em in

                                    “Zonun, Zonunmawi,

                                    Tap tap in ka au ding zo silo

                                    Zonun, Zonunmawi

                                    Liam loin la cham rih hram rawh awww!

Tiin, mangang leh pui tu tur mamawh ngawih ngawih chungin a au lawm lawm anih kha. Ram dang leh hnamdang ten an neih ve loh he “Zonunmawi” hi chhawm nuna, chhem alh anih leh theihna kei ni thangthar te hian mawhphurhna lian tak kan nei. He kan ram zimte hi khuanun mal a sawm leh zual theih nan Kristian nun dik tak leh Zonunmawi dik takkha parang a l vul leh nan kan puan vengte sawichhingin tan in la thar leh teh ang le….